2017-imi utoqqalinermi aammalu siusinaarluni soraarnerussutisiat
Saqqummersitami matumani aningaasat tunngaviusut malillugit pisortanit utoqqalinermi aammalu siusinaarluni soraarnerussutisiallit nassuiarneqarput.
Saqqummersitap ilusilersornera
Saqqummersitami 2013-imiit 2017-imut utoqqalinermi aammalu siusinaarluni soraarnerussutisiallit qaammat decembarimi amerlassusaat naatsorsorneqarput.
Immikkoortut aappaanni utoqqalinermi aammalu siusinaarluni soraarnerussutisialinnut kisitsisit pingaarnersiorlugit naatsorsorneqarput. Immikkoortumilu Kisitsisaataasivimmi tabelit saqqummersitamut tunngasut aqqanillit assigiinngitsut eqikkarneqarput.
Kisitsisaataasivimmi tabelini pingaarnertut sammineqarput soraarnerussutisiallit suiaassusaat, ukiui aammalu sumi najugaqarneri. Aammattaaq pingaarnertut sammineqarput soraarnerussutisiallit kisimiittutut imaluunniit aappariittut pisartagaqarnersut, tassuunalu aningaasat tunngaviusut pisartakkat nammineq aapparisalluunniit isertitai malillugit ilanngagaasarnersut aammalu soraarnerussutisialik ilanngariikkanik (kaasarfimmiunik) pisartagaqartuunersoq utoqqaat illuanni imaluunniit ullukkut unnuakkullu inissiisarfimmiinneq pissutigalugu.
Immikkoortut pingajuanni soraarnerussutisiallit ukiunut qaninnernut kingullernut sanilliullugit amerleriarnerat ikileriarnerallu sammineqarput. Immikkoortumi Kisitsisaataasivimmit tabelit marluk saqqummersitamut tunngasut kisitsisini tunngavigineqarput.
Immikkoortut sisamaanni pisortanit soraarnerussutisiat pillugit inatsit tunngaviusoq aammalu soraarnerussutisiaqartitsinissamut aalajangiinermi tunngavigineqartut pingaarnersiorneqarput. 2016-imi januaarip aallaqqaataani soraarnerussutisiat allanngortinneqarput. Aapparisap isertitai apeqqutaatinnagit kisianni nammineq saniatigooralugit isertitat apeqqutaatillugit soraarnerussutisiat tunngaviusumik annertussusilerneqarnerat allannguummi tassani pingaarnersaavoq. 2016-imi juulip aallaqqaataani soraarnerussutisiamut aaqqissuusseqqinneq atuutilerpoq. Siusinaarluni soraarnerussutisiallit sulisinnaassusaat ukiut tallimakkaarlugit nalilersorneqartalerpoq. Siusinaarluni soraarnerussutisiat inuup sulisinnaassusaa tunngavigalugu assigiinngitsunut pingasunut annertussusilerneqarpoq ima; soraarnerussutisiat annertuut, soraarnerussutisiat akunnattut, soraarnerussutisiat annikitsut.
1.januaari 2017 aallarnerfigalugu utoqqalinermi soraarnerussutisiaqarnissamut ukiut killigititat 65-imiit 66-inut qaffanneqarput. Tamanna kisitsisitigut paasissutissani ukiunut nalunaarsuutaasartut 2011-miit 2016-imut 65-imiit 69-imut nalunaarsorneqartarsimasut aammalu 2017-imi 66-imiit 69-imut nalunaarsorneqartarsimasut “70-it inorlugit ukiullit”-nik taaneqarnerannik kinguneqarpoq.Taamatuttaaq siusinaartumik soraarnerussutisialinnut nalunaarsuutit 2017-imi taamaallaat 65-inik ukiulinnik imaqarsimasut massakkut “65 +”-inik ilaneqarput.
Naatsorsuutit kommunit naatsorsuuserisarfiannit, Naatsorsueqqissaartarfiup inunnut nalunaarsuiffianit aammalu pisortat akissarsialeriviannit soraarnerussutisianullu nalunaarsuutinit kisitsisitigut paasissutissat pilersinneqarput. Immikkoortullu tallimaanni nalunaarsuutit tunngaviusut suliarineqarneri aammalu periaaseq nassuiarneqarput.
Naatsorsuutinit allanit assigiinngissut
Naatsorsueqqissaartarfiup saqqummersitaani ’’2015-imi isumaginninnermut ikiorsiissutinik pisartut”-ni utoqqalinermi aammalu siusinaartumik soraarnerussutisiallit amerlassusaannut tunngasut kisitsisit saqqummersinneqartut allaanerupput. Assigiinngissut immikkoortut tallimaanni nalunaarsuutinut periutsimi takuneqarsinnaavoq. “2015-imi isumaginninnermut ikiorsiissutinik pisartut” saqqummersinneqassaarnikuuvoq, tassunga taarsiullugu “20XX-imi utoqqalinermi aammalu siusinaarluni soraarnerussutisiallit”, “20XX-imi utaqqiisaagallartumik isertitat taarsiissutaasunik ikiorsiissutit” aamma “20XX-imi meeqqanut tapiissutinik pisartut” saqqummertalerput.
Kisitsisaataasivimmi
Kisitsisaataasivimmi kisitsisinik nammineq toqqakkanik aallertoqarsinnaavoq, uuttuutit soorlu najugaq, ikiorsiissut, ukiut, suiaassuseq, ukioq pineqartoq aammalu soraarnerussutisiat annertussusiisa katiternerisigut.